GADEWCH EICH SYLWADAU ISOD.


Trwy gydweithio â Bwrdd yr Iaith Gymraeg, roedd staff a gwirfoddolwyr yn brysur yn ymarfer eu cyfarchion Cymraeg.

Mae Mervyn Cousins, cyfarwyddwr gweithredol newydd Eisteddfod Llangollen, wedi bod yn brysur ei hun yn gwrando ar dapiau dysgu Cymraeg, ac mae'n paratoi i gofrestru ar gyfer cwrs dysgu Cymraeg ym mis Medi.

Dywedodd cyn yr Eisteddfod: "Er bod rhai aelodau o'r tîm yn siaradwyr Cymraeg rhugl (18 y cant), rydym wedi cynnig hyfforddi staff a gwirfoddolwyr sy'n ymwneud â'r cyhoedd yn unionyrchol, i gyfarch cwsmeriaid a chynnig gwasanaeth trwy gyfrwng y Gymraeg i'r rheiny fyddai'n well ganddynt drafod busnes â ni yn y Gymraeg.

"Rydym wedi safoni ein defnydd o'r iaith Gymraeg yn ein gwaith o ddydd-i-ddydd, ac wedi rhoi polisi ffurfiol at ei gilydd fel rhan o'n cydweithio â Bwrdd yr Iaith Gymraeg."

Fel rhan o'r polisi hwnnw, mae gwaith paratoi wedi ei wneud yn ystod y misoedd diwethaf i safoni'r arwyddion oedd i'w gweld ar faes yr Eisteddfod, o fewn cyllid penodol, ac i annog stondinwyr i ddilyn yr un drefn.

Mae'r tîm hefyd wedi bod yn brysur yn uwchraddio eu gwefan gyfredol uniaith Saesneg i fod yn wefan ddwyieithog, gan gynnig y cyfle i siaradwyr Cymraeg i chwilio am wybodaeth am yr Eisteddfod ar y we fyd eang trwy gyfrwng y Gymraeg.

Mae'r Eisteddfod wedi dilyn canllawiau safon meddalwedd dwyieithog Bwrdd yr Iaith i ddatblygu'r wefan.

Yn ôl Mervyn Cousins: "Mae'r gwaith hwn yn fuddsoddiad i'r Eisteddfod Ryngwladol, buddsoddiad cyfredol sy'n sicr o ddatblygu.

"Oherwydd cyfyngiad ar gyllid, ni allwn wella ein gwasanaeth Cymraeg dros nos, ond byddem yn parhau i weithio gyda'n staff, gwirfoddolwyr, cystadleuwyr, cwsmeriaid, partneriaid, a chyrff eraill i wella ein gwasanaeth Cymraeg.

"Gan ein bod yn ddigwyddiad rhyngwladol, rydym yn cyfathrebu trwy amryw o ieithoedd, a bydd ffurfioli'n defnydd o'n hiaith frodorol yn bendant yn cynnig buddiannau i gystadleuwyr ac ymwelwyr yr Eisteddfod."

Yn ôl Ifan Evans, cyfarwyddwr sector breifat a busnes Bwrdd yr Iaith Gymraeg: "Dethlir Eisteddfod Ryngwladol Llangollen ar draws y byd oherwydd ei haml-ddiwylliannau a'i hamrywiaeth iaith.

"Dros y misoedd diwethaf rydym wedi cydweithio â threfnwyr yr Eisteddfod ar eu polisi iaith Gymraeg newydd, ac rydym yn falch o weld y bydd yr Eisteddfod yn llawer mwy dwyieithog eleni.

"Bydd hyn yn galluogi'r Eisteddfod i gynnig profiadau cofiadwy, nodedig ac unigryw Gymreig i'w chystadleuwyr a'i hymwelwyr.

"Rydym yn llongyfarch Mr Cousins a'i dîm am eu brwdfrydedd a'u cefnogaeth i'r iaith Gymraeg, ac rydym yn sicr y gwnaiff hyn arwain yr Eisteddfod i lwyddiannau pellach."


GADEWCH EICH SYLWADAU ISOD.