AP realiti estynedig o enwau lleoedd cynhenid ydi Tro.
Daeth y syniad o greu ap o enwau’r tirwedd i fodolaeth ar ddiwedd cynhadledd a gynhaliwyd yn enw Mynyddoedd Pawb rhyw ddwy flynedd yn ôl.
Mynyddoedd Pawb, AHNE Bryniau Clwyd a Dyffryn Dyfrdwy a Cwmni Galactig sy’n gyfrifol am yr ap.
Fe sicrhawyd grant Cymraeg 2050 Llywodraeth Cymru i ddatblygu’r prosiect, sydd hefyd yn cyd-weithio hefo Menter Iaith Sir Ddinbych a Menter Iaith Fflint a Wrecsam.
Mae Tro yn cynnwys rhan ogleddol o Lwybr Clawdd Offa o Brestatyn i’r Waun.
Wrth gerdded, bydd y ffôn fach yn ddirgrynu pan o fewn dalgylch penodol.
Yna, mae modd edrych ar yr olygfa trwy sgrin y ffôn er mwyn gweld enwau’r lleoedd yn ymddangos.
Wrth rhoi eich bys ar yr enw ar y sgrin, clywir ynganiad a cheir ystyr a chefndir i bob enw.
Cafwyd cymorth gan Hywel Wyn Owen a defnyddiwyd llyfrau Dictionary of the Place Names of Wales (Hywel Wyn Owen a Richard Morgan) a Placenames of Flintshire (Hywel Wyn Owen a Ken Lloyd Gruffydd) wrth ddatblygu cynnwys yr ap.
Mae Mynyddoedd Pawb wedi bod yn ymgyrchu i gynyddu’r ymwybyddiaeth o’r dreftadaeth Gymraeg yn y maes awyr agored ers sawl blwyddyn.
Aed â deiseb i’r Cynulliad yn 2015 oedd yn ceisio darbwyllo Llywodraeth Cymru fod gwerth addysgol ac economaidd yn ogystal a diwylliannol i’n enwau lleoedd cynhenid.
Meddai Mari Gwent, o Mynyddoedd Pawb: “Bydd yr ap yn cyflwyno'r Gymraeg a’i chyfoeth i bawb, yr enwau llefydd fydd yr allwedd i hynny.
"Gobeithiwn y bydd yr ap yn ysgogi diddordeb yn yr iaith, ac yn ennyn diddordeb ac ymwybyddiaeth o gyfoeth ein treftadaeth leol.”
Dywedodd Gweinidog y Gymraeg Eluned Morgan AC: "Mae gennym gynllun uchelgeisiol i gynyddu nifer y siaradwyr Cymraeg i filiwn erbyn 2050.
"Er mwyn gwneud hyn, rhaid inni ei wneud mor hawdd â phosibl i bobl ddefnyddio'r Gymraeg yn eu bywydau bob dydd.
"Dyna pam mae sicrhau bod pobl yn gallu defnyddio technoleg ddigidol drwy gyfrwng y Gymraeg mor hanfodol.
"Rwy'n falch iawn bod Llywodraeth Cymru wedi gallu helpu i ariannu’r ap newydd hwn TRO sydd yn cael ei lansio heddiw.
"Dyma ddatblygiad cyffrous iawn sy’n caniatáu i gerddwyr archwilio enwau lleoedd ar draws tirweddau gogoneddus gogledd-ddwyrain Cymru mewn realiti cymysg ar eu dyfais ddigidol, hyn oll drwy gyfrwng y Gymraeg."
I lawrlwytho’r ap ewch i wefan Tro.cymru cyn dechrau crwydro ar hyd Llwybr Clawdd Offa.
Comments: Our rules
We want our comments to be a lively and valuable part of our community - a place where readers can debate and engage with the most important local issues. The ability to comment on our stories is a privilege, not a right, however, and that privilege may be withdrawn if it is abused or misused.
Please report any comments that break our rules.
Read the rules here