WEDI cyfnod ansicr ac anwadal i gymunedau, mae llewyrch y gwanwyn a’r Pasg wedi dod a bwrlwm i ganolfannau cymunedol ledled yr ardal.
Wrth reswm, gyda gofal mae nifer yn ymgynnull a threfnu digwyddiadau, gyda mesurau diogelwch i liniaru’r risg o ledaenu Covid-19 yn flaenllaw.
Mae’r Neuadd Bentref yn Groes ger Dinbych wedi gweld ail wynt dros yr wythnosau diwethaf, gyda dau ddigwyddiad cyhoeddus yn tynnu pobl yn ôl at ei gilydd.
Neuadd Plwyf y Bylchau yw enw swyddogol y lleoliad, a thrwy fore coffi cymunedol a helfa Wyau Pasg, mae’r trefnwyr wedi codi £630 i elusennau yn Wcrain ac yn agosach at adref, The DPJ Foundation, elusen iechyd meddwl sy’n cefnogi trigolion sy’n byw yng nghefn gwlad.
Mewn cyfnod heriol, mae cymunedau yn tynnu ynghyd i gynorthwyo eraill.
Ac mae’n debyg y gellid nodi bod digon o angen personol gan unigolion a theuluoedd o ganlyniad i’r codiadau costau byw mawr sy’n wynebu trigolion ar hyn o bryd.
Ond diwylliant o rannu a rhoi sydd gennym ni yng Nghymru, a diolch am hynny. Gwnewch y pethau bychain, meddai Dewi Sant.
A thros gyfnod y Pasg, mae’n sicr bod nifer wedi rhoi wy Pasg, casgliad i goffrau capel neu eglwys a rhodd i elusennau lle mae gwir angen cymorth a chefnogaeth.
Felly diolch, diolch i bob un ohonoch sy’n cyfrannu yn fawr ac yn fach - mae bob un rhodd o gymorth i rywun.
Comments: Our rules
We want our comments to be a lively and valuable part of our community - a place where readers can debate and engage with the most important local issues. The ability to comment on our stories is a privilege, not a right, however, and that privilege may be withdrawn if it is abused or misused.
Please report any comments that break our rules.
Read the rules here